آؤ کبھو تو پاس ہمارے بھی ناز سے

آؤ کبھو تو پاس ہمارے بھی ناز سے

کرنا سلوک خوب ہے اہل نیاز سے

پھرتے ہو کیا درختوں کے سائے میں دور دور

کر لو موافقت کسو بے برگ و ساز سے

ہجراں میں اس کے زندگی کرنا بھلا نہ تھا

کوتاہی جو نہ ہووے یہ عمر دراز سے

مانند سبحہ عقدے نہ دل کے کبھو کھلے

جی اپنا کیوں کہ اچٹے نہ روزے نماز سے

کرتا ہے چھید چھید ہمارا جگر تمام

وہ دیکھنا ترا مژۂ نیم باز سے

دل پر ہو اختیار تو ہرگز نہ کریے عشق

پرہیز کریے اس مرض جاں گداز سے

آگے بچھا کے نطع کو لاتے تھے تیغ و طشت

کرتے تھے یعنی خون تو اک امتیاز سے

مانع ہوں کیوں کہ گریۂ خونیں کے عشق میں

ہے ربط خاص چشم کو افشائے راز سے

شاید شراب خانے میں شب کو رہے تھے میرؔ

کھیلے تھا ایک مغبچہ مہر نماز سے