Sauda Tha Balaae Josh Par Raat

سودا تھا بلائے جوش پر رات

بستر پہ بچھائے نیشتر رات

بگڑے تھے یہاں وہ آن کر رات

بے طور بنی تھی جان پر رات

ہم تا سحر آپ میں نہیں تھے

کیا جانے رہے وہ کس کے گھر رات

افسانہ سمجھ کے سو گئے وہ

کام آئی فغان بے اثر رات

آئینے میں ہو نہ موم جادو

سوتے نہیں اب وہ تا سحر رات

تارے آنکھیں جھپک رہے تھے

تھا بام پہ کون جلوہ گر رات

اندھیر پڑا زمانے میں ہائے

نے دن کو ہے مہر نے قمر رات

اس لیل و نہار غم نے مارا

ہے روز سے سیاہ تر رات

کیا پوچھو ہو منکر و نکیر آہ

بگڑے جو وہ طعن غیر پر رات

یہ بات بڑھی کہ مر گئے ہم

موت آئی تھی قصہ مختصر رات

اس گھر میں ہے عیش خلد مومنؔ

کیا جانے کہاں ہے دن کدھر رات